.... قـــالوا معـــــاق ....

.... قـــالوا معـــــاق ....


لمحتهم يتهامسون وكل كلامهم عني
واحد ينبه صاحبه وعلى امتد النظر
كلما رحت لمكان عيونهم حاصرتني
فضول كان أو ألم ولا حتى غرور وكبر
مايفهمون هالكرسي وحده فاهمني
ترا ماني بعاجز تراني أقدر وأقدر
نعم ناقصني شي لكن الباري انعمني
باللي ماتقوون تاخذونه إنتو يابشر
صحيح فاقد ساقي ولكن هذا مايعني
ما أقوى اللي تسوونه لا وبعد أكثر
بسكت وإنجازاتي بتحكي لكم عني
كافي الإرادة سلاحي وبهالدنيا والصبر
بين أيديكم كتاباتي ولوحاتي وفني
وهذا آن بكل ميدان أبدعت بالسهر
بقدراتي ومواهبي قدرت اعمر وأبني
ماوقف طريجي كل ما تعثرت بحجر
إن بغيت أقدر اخلي الأحجار تغني
إن بغيت أقدر أخلي هالصحرا زهر
تحديت نفسي والزمن وعييت انحني
قلتها لنفسي والحين كاني اعلنها بجهر
قالوا معاق قلت والنعم هالشي يشرفني
كوني معاق بجسمي والله إني أفتخر
ولا إني اكون معاق القلب ويفضحني
موت المشاعر ليه صار القلب هو القبر
لمحتهم يتهامسون وكل كلامهم عني
مليت نظراتهم اللي تملاها آلام القهر
وآنا عاهدت نفسي إن ما عاد يهمني
لكن ودي أعرف متى بتفهمون يا بشر